አቤት እንጀራቸው ሲጣፍጥ ..Abet Enjerachew Sitafit ( Short story)

ግጥሞች፣ታሪኮች፣ፎቶዎች፣ሙዚቃዎች
Poems,Short stories, graphics,pictures,musics,Technology
ኦሽንoc
Leader
Leader
Posts: 1129
Joined: 07 Aug 2009 14:20
Contact:

አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by ኦሽንoc » 27 Sep 2009 11:54

ENJERA STORY አቤት እንጀራቸው ሲጣፍጥ
PART 1


ማሳሰቢያ፡ በዚህ ልብ ወለድ ታሪክ ውስጥ የተጠቀሱት ስሞች በህይወትም ካሉ በሞትም ከተለዩን ሰዎሽ ጋር ተመሳሳይነት ቢኖረው ያጋጣሚ ጉዳይ መሆኑን ደራሲው በጥብቅ ያሳስባል።
ስለፅሁፉ አስተያየት በስልክ 206-888-7497 በኢ-ሜል enjera.story@gmail.com" onclick="window.open(this.href);return false" ለደራሲው በቀጥታ ማስተላለፍ ይቻላል።
የደራሲው መብት በህግ የተጠበቀ ነው
Image
Copyright©2009 by Yewondwossen Adefris. Seattle, WA. USA. All rights reserved.
******************************************************

ቅድመ ታሪክ
አቶ ቸኮል ግርማ ፣ አቶ ኪነ ጥበቡ ፣ ወ/ሮ አቻምየለሽ እና አቶ ስቲቭን ሁሉም በአንድ ህንፃ (አፓርትመንት) በሲያትል ከተማ ሬኔር-ቢች በተሰኘው መንደር የሚኖሩ ጎረቤቶች ናቸው።አ
ቶ ቸኮል እድሜው 33 ሲሆን በታክሲ ነጅነት ይተዳደራል። አቶ ኪነ እድሜው 23 ሲሆን በቅርቡ ዲቪ (የአሜሪካ ነዋሪነት እጣ ) አግኝቶ የመጣ ተማሪ ነው።
ወ/ሮ አቻምየለሽ እደሜአቸው 63 ሲሆን በሲያትል ሸረተን ሆቴል ማእድ ቤት ውስጥ በረዳትንት ይሰራሉ በተጨማሪም እቤታቸው ውስጥ እንጀራ እየጋገሩ ይቸረችራሉ።
አቶ ስቲቭን የህንፃው ተቆጣጣሪ (ማኔጀር) ነጭ አሜሪካዊ ነው።

አቤት እንጀራቸው ሲጣፍጥ

(ክፍል 1)

ደራሲ የወንድወሰን አደፍርስ

“እማማ እንጀራ አለ?” ከደጃፍ ሆኖ
“አዎን አለ ፤ ግባ ፣ ትኩስ ነው ፣ አሁን ነው የጋገርኩት”
የእንጀራውን ትኩስነት ትንሿ ቤታቸው ውስጥ የታመቀው የአየር ሽታ ይመሰክራል
“ኪነት ነው ያልከኝ ስምህን?” አሉ ወ/ሮ አቻም የለሽ
“ኪነ” ብሎ አረማቸው
“ኪነ? ምንድነው ኪነ ብሎ ስም?
“ያባቴ ስም ጥበቡ ስለሆነ አንድ ላይ ትርጉም አለው ብላ ነው እናቴ የሰየመችኝ”
“አሃ! ኪነ-ጥበቡ ፣ ቆንጆ ስም! ጎንደሬ ነህ እንዴ? ጎንደር ነው ስም ማሳካት የሚወድ”
“የለም ጉራጌ ነኝ”
“ብቻ እንደ ጎንደሬ እንዳትግደረደር። ተግደርዳሪ ጦም አዳሪ ሲባል ሰምተሃል?” አሉ ለጨዋታ ያህል ሳቅ ብለው ፍንጭት ጥርሳቸውን እያሳዩት
“ቁጭ በል ትንሽ እስኪበርድ ድረስ” ርጥብ ፀጉራቸው ላይ ፎጣ ተቀምጧል
“አሁን እኮ አካላቴን ታጥቤ መውጣቴ ነው” እግራቸውን ረጅሙን ቀሚሳቸውን ከፍ እያደረጉ ኒቪያ የሚባል ቅባት እየቀቡ
“አቤት የሰሞኑ ብርድ? ቆማጣ ያሳቅፋል” ለራሳቸው ነበር እንደዛ ያሉት ፣ ሆኖም ኪነ በዚህ ግዜ ነበር በድፍረት ስሜቱን ለመግለጽ የቆረጠው
“እግርዎ በጣም ያምራል” አለ ሲፈራ ሲቸር ፣ በልቡ ሲመኛቸው ከርሟል ። በደንብ ስላላዳመጡትና የእግራቸውን ውበት ያደንቃል ብለው ስላልገመቱ “የምን እርጎ?” አሉ በመገረም፣ በእድሜ ከ 40
አመት በላይ የሚበልጡትን የ 63 አምት ሴትዮ ለማሽኮርመም መሞከሩ አስደንግጦት ልቡ ይመታል።
“ወይኔ ተዋርጄ ነበር” አለ በልቡ አለማወቃቸው ደስ ብሎት
“ቸኮል ያለፈው ሳምንት ከርስዎ የገዛ መስሎኝ?” አለ ቶሎ ብሎ የጓደኛውንና የሌላውን ጎረቤተኛቸውን ስም እየጠራ
“አይ! ሴፍዌይ እያለ ማ ከእርጎ ጋር ይግማማል? አሉ የሰፈራቸውን የምግብ መደብር አገጫቸውን ቀና አድርገው እያመለከቱ
ቀጠል አርገው “ዮገርት ነው እኮ የሚሉት” አሉ የእንግሊዝኛ ችሎታቸውን ለማሳየት ።
ያለፈው ወር ከሶሻል ሴኩሪቲ አድሚኒስትሬሽን (የጡረታ ሚኒስቴር መሆኑ ነው) በስማቸው የተላከላቸውን ጽሁፍ የተረጎመላቸውን አስታወሰ።
ከሁለት አመት በህዋላ $640ዶላር ከአሜሪካ መንግስት አበል ያገኛሉ ሲላቸው እልልታቸውን ሲያቀለጡት ጎረቤታቸው የሆነው የህንፃው ተቆቆጣጣሪ አቶ ስቲቭን እየሮጠ መጣ። አይናቸው ላይ
ያቀረረውን የደስታ እንባቸውን አስተውሎ “ምን ሆና ነው?” ብሎ በመጨነቅ ጠየቀው
“የጡረታ አበል በሁለት አመት ውስጥ እንደሚያገኙ ስለሰሙ ተደስተው ስሜታቸውን መግለጻቸው ነው” አለው ከሶሻል ሴኩሪቲ የተላከውን ወረቀት እያሳየው
“መድሐኔ አለም እንዴት እንዴት እንዴት እንዴት አድርጌ ነው የማመሰግንህ?” ያቀረረው እንባቸው ቁልቁል መውረድ ጀምርዋል
አቶ ስቲቭን እጆቻቸውን ወደ ላይ መዘርጋታቸውን አይኖቻቸውን ኮርኒሱ ላይ መደቀናቸውን በማስተዋሉ ትርጉም አላስፈለገውም ፤ የምስጋና ፀሎት መሆኑ ገብቶታል
“ቡሽ ጥሩ መሪ አይደለም ፤ ገንዘብ አባክንዋል ፣ ኢኮኖሚውን አዳክሟል ፤ መንግስት ለጡረተኞች የገባውን ቃል ኪዳን ለመወጣት ገንዘቡ ይኖር ይሆን? ” አቶ ስቲቭን ጥያቄውን ለራሱ ያቀረበ
ይመስል ትንሽ እንደመተከዝ አለ
ወ/ሮ አቻሜ የተናገረውን ሁሉ ባይረዱም ስለ ፕሬዘዳንት ቡሽ መጥፎ ነገር እንዳወራ ገብቷቸዋል
“ይሄ ሁሉ በረከት የደረሰኝ በቡሽ ዘመን ነው ልጄ፣ በአይኔና በቡሽ የሚመጣብኝ ሰው አልወድም! ቡሽን እንዳባቴ ነው የማየው” ቀኝ እጃቸውን ደረታቸው ላይ አድርገው እንባቸውን በግራ እጃቸው
አያበሱ ፈገግ ማለት ጀመሩ ።
“ንገረው አንደሱ ብለህ” አሉት ኪነን ቃል በቃል አንዲያስተረጉምላቸው ፈረንጁን አይን አይኑን እያዩት
“ቡሽን ትወዳለች” አለ ባጭሩ ለማስተርጎም
“ኤዲያ! አንተ ደግሞ በደንብ አልነገርከውም” አሉ ኪነ ላይ ፊታቸውን አጥቁረው
“ቡሽ ማይ ፋዘር” አሉ እንግሊዝኛውን አሳክተው
ጨመር አድርገው “የቡሽ አስተዳደር ዘመን ማለቁ ቅር ይለኛል” ሲሉ
“እንዴ? በኦባማስ በመጀመሪያው ጥቁር ፕሬዘዳንትነት አይኮሩም? ” አለ ኪነ አየሳቀ
“ታድያ ኦባማ ቢጠቁር ምን ይጠበስ? ከመንግስቱ ሐ/ማርያም በላይ የጠቆረ አለ?”
በዚህ ሁሉም እየሳቁ ተለያዩ። ኪነም የልቡን ስሜትና በላስቲክ የተሸፈነውን እንጀራ ተሸክሞ ወደ ቤቱ ገባ
∞∞∞∞∞∞፨፨፨፨∞∞∞∞∞∞∞
በብቸኝነት አልጋው ላይ ተጋድሞ ለመተኛት ቢሞክር እንቅልፍ አልወስድ አለው።የ ወ/ሮ አቻሜ ረዘም ቀጠን ኮራ ብለው የሚታዩት እግሮች እንደ እንቡጥ ጽጌረዳ-አበቦች እንስ ክርክም ቁንጅት
ብለው በቀለም ያሸበረቁት ጥፍሮች በአይኑ መጡበት
ከዚህ በፊት ቸኮል ራሱ ያጫወተው የቸኮልና የወ/ሮ አቻም የለሽ የሚስጥር ምሽት ታሪክ እንደ ሲኒማ በአይኑ
መጣበት። በተለይም በመደጋገም “አቤት እንጀራቸው ሲጣፍጥ” እያለ ያወራለት የሚስጥር ወሬ የእህል ሳይሆን የግብረ ስጋ ድግስ እንደነበረ ሲያስታውስ እንቅልፍ ሽልብ አደረገው።
በሁለት ሳምንቱ ኪነ እንደልማዱ እንጀራ ሊገዛ ወ/ሮ አቻም የለሽ ቤት ሄደ
“እሺ አቶ ኪነ-ጥበቡ አገሩን ለመድክ?”
“ምንም አልል እግዚያብሔር ይመስገን”
“እኔ እኮ ስምህ ኪነት መስሎኝ በደርግ ግዜ የተወለደ መሆን አለበት ስል ነበር ፣ ኪነት ኪነት እያሉ ያደርቁን ነበር ፡ በሽታ ያድርቃቸው”
በላስቲክ የተጠቀለለውን አስር እንጀራ ተቀብሎ $5.00 ብር ከኪሱ አውጥቶ ሰጣቸው
“ዛሬ የፈለገው ነገር ቢመጣ ስሜቴን ሳልገልፅላቸው አልወጣም” ብሎ ለራሱ እየፎከረ እያለ
“ለመሆኑ እንጀራዬን ወደድከው?” አሉ በቀኝ እግራቸው የግራውን እየዳበሱ
“በጣም ቆንጆ እንጀራ ነው! በሙሉ ጤፍ ነው አይደል ?”
“ትንሽ ማሽላ እጨምርበታለሁ፣ እንደው ላመል ያህል ፣ አለበለዚያ አይወጣም” አሉ በሙያቸው በመኩራት
“እኔማ ደፈረኝ አይበሉኝ እንጂ ያኛውን እንጀራዎትን ነበር መቅመስ የፈለኩት”
“የምን እንጀራ?” አሉ ግንባራቸውን አጨማደው በመገረም
ፈገግ ብሎ በአይኑ ጠቀሳቸው
ለትንሽ ግዜ አይኑን ፍጥጥ ብለው አዩት ፣ እሱም በዝምታ ነጭ ጥርሱን አሳይቶ በመጨረሻም ከንፈሩን በምላሱ አበሰው
“እመ ብርሀን ጥርስህን ታርግፈው! መድሃኔ አለም አይንህን ያፍሰው!
ኡኡታቸውን አቀለጡት “ወይኔ ወይኔ ወይኔ ወይኔ ወይኔ አቻሜ ሞቻለሁ”
በዚህ ቅጽበት መሪትዋ ተሰንጥቃ ብትውጠው ደስ ባለው ነበር። ላብ ጥምቅ አደረገው ፣ አፉም ተሳሰረ
ሆኖም እንደምንም እየተንተባተበ “ተዉ እማማ ለቅሶ አይገባም፣ እኔ እንኮ ቀልዴን ነው” አለ
“አፈር ድሜ ብላ!” ብለው የሰጣቸውን ገንዘብ ፊቱ ላይ እንጀራውን ከእጁ መንጭቀው መሬት ላይ ወረወሩት፣
“እባክዎትን እማማ ……. ብሎ ሳይጨርስ
“በህግ አምላክ ውጣልኝ” እንደገና ኡኡታቸውን አቀለጡት፣እንባቸውም ዱብ ዱብ ይል ጀመር
አቶ ስቲቭን የ ወ/ሮ አቻም የለሽን ጩኸት ሰምቶ እንደልማዱ እየሮጠ ሲመጣ
ኪነም ቁጣቸውን ፈርቶ እግሬ አውጭኝ ብሎ ሲሸሽ መንገድ ላይ ተገናኙ
“ዛሬስ ምን አግኝተው ነው የተደሰቱት?” አለው ሳቅ ብሎ ፣ ጩኸታቸውና እንባቸው አሁንም የደስታ መስሎት
ኪነም ቶሎ ብሎ “ሎተሪ የወጣላቸው መሰለኝ” ብሎ ጥያቄ ሳይበዛበት ወደ ውጭ ቶሎ ቶሎ መራመድ ጀመረ ፣ አቶ ስቲቭንም ወደ ወ/ሮ አቻም የለሽ ቤት አመራ።
ከትንሽ ግዜ በሁዋላ ኪነ ኮቴ ይሰማዋል። ዞር ሲል አቶ ስቲቭን በንዴት “አንተ ወስላታ!” ብሎ አንገቱን እንቅ ሲያደርገው ከህልሙ ብንን አለ።

ይቀጥላል

ኦሽንoc
Leader
Leader
Posts: 1129
Joined: 07 Aug 2009 14:20
Contact:

Re: አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by ኦሽንoc » 27 Sep 2009 12:06

ስለ ጽሁፉ ያላችሁን አስተያየት መተው ትችላላችሁ።
Comment on the story ?...

User avatar
selam
Leader
Leader
Posts: 175
Joined: 25 Aug 2009 01:59
Contact:

Re: አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by selam » 27 Sep 2009 20:03

ኡፈይ...እንካን ህልም ሆነ..! ግን ምን ይሆን መጨረሳው...

helen
Starter
Starter
Posts: 19
Joined: 10 Aug 2009 17:36
Contact:

Re: አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by helen » 30 Sep 2009 17:19

እማማ አካብዴ ምን ያደርጉት ይሆን???

Martha
ጀማሪ Starter
ጀማሪ Starter
Posts: 7
Joined: 24 Sep 2009 18:12
Contact:

Re: አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by Martha » 30 Sep 2009 17:42

አጓጊ ታሪክ ። love to know what will happen to kine. and wish if u can post part 2 soon. : :

tsigehana
Jogger
Jogger
Posts: 31
Joined: 09 Aug 2009 19:44
Contact:

Re: አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by tsigehana » 30 Sep 2009 19:34

ህልም መሆኑ በጀው.....ነገሩ ወዴት ያመራ ይሆን????

tsigehana
Jogger
Jogger
Posts: 31
Joined: 09 Aug 2009 19:44
Contact:

Re: አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by tsigehana » 30 Sep 2009 19:47

plz! part 2.....post it quickly as much as u can.
im interested to know what will happen to kine

ኦሽንoc
Leader
Leader
Posts: 1129
Joined: 07 Aug 2009 14:20
Contact:

Re: አቤት እንጀራቸው ሲጣፍጥ ..Abet Enjerachew Sitafit ( Short story)

Unread post by ኦሽንoc » 01 Oct 2009 02:12

--------------------------------------****************************-------------------------------------
ቅድመ ታሪክ፡ አቶ ቸኮል ግርማ ፣ አቶ ኪነ ጥበቡና፣ ወ/ሮ አቻምየለሽ በሲያትል ከተማ ሬኔር-ቢች በተሰኘው መንደር የሚኖሩ ጎረቤቶች ናቸው።አቶ ቸኮል እድሜው 33 ሲሆን በታክሲ ነጅነት ይተዳደራል። አቶ ኪነ እድሜው 23 ሲሆን በቅርቡ ዲቪ (የአሜሪካ ነዋሪነት እጣ ) አግኝቶ የመጣ ተማሪ ነው። ወ/ሮ አቻምየለሽ እደሜአቸው 63 ሲሆን በሲያትል ሸረተን ሆቴል ማእድ ቤት ውስጥ በረዳትንት ይሰራሉ በተጨማሪም እቤታቸው ውስጥ እንጀራ እየጋገሩ ይቸረችራሉ ። ወ/ት ሱዛን ዞርን እድሜዋ 25 አምት ሲሆን በአዲስ አበባ ተወልዳ ያደገች በዩኒቨርስቲ ኦፍ ዋሽንግተን የህክምና ተማሪ ነች ፣ በተጨማሪም አርብ እና ቅዳሜ በዱከም-አዳራሽ በተሰኘው የኢትዮጵያ ምግብ ቤት ባስተናጋጅነት ትሰራለች ። ወ/ሮ ልሳነ-ማርያም እድሜያቸው 43 ሲሆን የ ‘ዱከም-አዳራሽ’ ባለቤት ናቸው።
ሌሎች በአጭር የተጠቀሱ ስሞች
1. በራክ ኦባማ፡ በታሪክ የመጀመሪያው የአሜሪካ ጥቁር ፕሬዘዳንት
2. ሚሼል ኦባማ፡ የበራክ ኦባማ ሚስት
3. ሳሻና መሊያ፡ የበራክ ኦባማ ሴት ልጆች
4. ጆን መኬን፡ የበራክ ኦባማ ተቀናቃኝ ተወዳዳሪ የነበረው የምክር ቤት አባል
5. መንዜው፡ የአቶ ማርቆስ ሉቃስ ቅፅል ስም። አቶ ማርቆስ እድሜው 53 ሲሆን መኪና በመጠበቅ ይተዳደራል፤ በተጨማሪም አልፎ አልፎ በአዝማሪነትና ፣ በሬንተኑ ኡራኤል ቤተ-ክርስቲያን በዜማ ያገለግላል። በመጨረሻም የመመማ (መንዝ-መረዳጃ-ማህበር) ሊቀ-መንበር ተብሎ በሚኒያፖሊስ ከተማ በመጋቢት 11 በተደረገው የማአከላዊ ጉባዬ ላይ ተመርጧል።
6. ፓሪስ ሂልተን፡ ቆንጆዋ የሂልተን ሆቴል ባለቤቶች ልጅ



[center]አቤት እንጀራቸው ሲጣፍጥ [/center]

(ክፍል 2)
ደራሲ የወንድወሰን አደፍርስ

ቀኑ ብርድ ቢሆንም ደስታ የተሞላበት ነበር ። ሰው ሁሉ ፣ የአሜሪካ ፕሬዘዳንት ምርጫ ውድድር አሸናፊው በታወቀበት ምሸት በዱከም አዳራሽ ጢም ብሎ ሞልቶ ሲ-ኤን-ኤን እያየ ይበላል ፣ ይጠጣል፣ ያወራል ፣ ይደሰታል።
“ዝፈን እንጂ! መንዜ” ብሎ ጮኸ ፤ ከኋላ ያለው ጠሪጴዛ ላይ ፣ ከአንዲት ቆንጆ ጋር የተቀመጠው ወጣት
“እራቱ በግዜ” ብሎ መለሰለት
“ምሳው አስር ግዜ” አለች ቆንጄዬዋ ቀበል አድርጋ። ቆዳዋ ጠቆረ እንጂ ፣ መልኩዋም ፤ ቅልስልስነቷም ፓሪስ-ሂልተንን ትመስላለች
“ከተሳደብሽማ ዱላ መምዘዜ” ብሎ አስጠነቀቃት
አንገቱ ላይ አኮርዲዮኑን አንጠልጥሎ ፣ እየተወዛወዘ መዝፈን ጀመረ
“ኩራት ኩራት አይልህም ወይ? ኩራት ፣ አይልህም ወይ? ሚሼል ኦባማ ያንተ አይደለች ወይ?” ሲል ፣ ወንድ ሁሉ እጁ እስኪቀላ አጨበጨበ
“ኩራት ኩራት አይለንም ወይ? ኩራት ፣ አይለንም ወይ? ሳሻ-ና-መሊያ የእኛ አይደሉም ወይ? ኩራት አይለንም ወይ? ሲል ፣ የወለደ ሁሉ በደስታ አበደ
“ኩራት ኩራት አይልሽም ወይ? ኩራት ፣ አይልሽም ወይ? በራክ ኦባማ ያንቺ አይደለም ወይ ? ኩራት አይልሽም ወይ?” ሲል ፣ ሴቱ ሁሉ እልልታውን አቀለጠው ።
“ይሄ ነው ወይ መኬን አፈርኩልህ! ጆን መኬን አፈርኩልህ! ሲል ሰው ሁሉ በሳቅ ተንፈራፈረ
ወ/ሮ ልሳነ-ማርያምም ፈገግ ብላ ነበር። ሆኖም ፣ ከኦባማ መመረጥ ፣ ከምሽቱ ፖለቲካ ይልቅ ፣ የተቀዳው ውስኪ ፣ የፈሰሰው ቢራ ፣ የዱከም የደራ ገበያ ነበር አንጀቷን ያራሳት
“ዛሬ ዱለት ሳይሆን ፈርስ ነው የቸረቸርኩት” አለች ለራሷ ። ሁል ግዜ ገበያዋ ሲደራና ስትደሰት የምትለው ፈሊጥ ነው።
ቸኮል ግን ፣ በብቸኝነት አንጀቱ እየተቃጠለ ነበር። ከአካል መታጠቢያ ገንዳ ወጥቶ ፣ ግድግዳ ላይ በእንፋሎት የተሸፈነውን መስታወት በትልቅ ፎጣ ጠረገው። በራ-ራስ ፣ የቀላ-አይን ፣ ሰልካካ-አፍንጫ የያዘ ፊት አፈጠጠበት። ከጉንጩ እስከ አገጩ የሚደርስ ወፈር-ያለ ጠባሳ ይታያል።
ራቁቱን ነው ። ፊቱን ወደ መስታወቱ ጠጋ እያረገ ፣ አንዴ ወደ ግራ ፣ አንዴ ወደ ቀኝ እየዞረ ፣ ከንፈሩን በልጠጥ አድርጎ ነጭ ጥርሶቹን በእርካታ ሲያስተውል ቆየና ፣ በመጨረሻ የሆዱ ምስል ላይ እራሱን እየነቀነቀ በትካዜ አተኮረ።
“እቺ ሴትዮ ቀለደችብኝ እኮ” ለራሱ ነበር የሚያወራው ። የወ/ሮ ልሳነ-ማርያምን ስም መጥራት ጠልቶ “ልሳኗ ይዘጋ ፣ አቃጣሪ ! ” አለ
የዛሬ ስድስት ወር አካባብቢ ዱከም አዳራሽ ለምሳ ሄዶ ነበር። “ሰውየው ሊፈነዳ ነው እኮ ! ፣ መካሪ ዘመድም የለውም እንዴ? ፣ ከሞተ እኮ ገበያዬ ይቀዘቅዛል” ብላ ስትስቅ የሰማትን እያስታወሰ ፣ ብግን ብሏል ። ኮቱን ረስቶ ስለነበር ፣ በኋላ በር መግባቱን አላስተዋለችም።
ንዴቱን ለመቆጣጠር ካለመቻሉ የተነሳ ፣ አንዳንዴ ፣ በተለይም በመጠጥ ትንሽ ሞቅ ሲለው “ወላቃ ጥርሷን አርግፌላት አገሬ ልግባ ይሆን? ” እያለ ራሱን ይጠይቃል ። ሰሞኑን ፣ በብስጭት አእምሮውን እንደመሳት እያረገው ፣ እስከዛሬ ሲመገበው የነበረው እንጀራ ውስጥ ፣ ሆድ የሚያሳብጥ ፣ ቦርጭ የሚያሰፋ ነገር ፣ሳይጨመርበት አይቀርም ፣ የሚል እምነት አድሮበታል።
“ሊጡ ውስጥ ስንዴ ብቻ ሳይሆን ሲሚንቶም ትጨምር ይሆን? ፣ ከበላሁት በህዋላ ሆዴን በጣም ነው የሚከብደኝ፤ እንቅልፍ እንጂ ስራ አያሰኘኝም” አለ ቀጠል አድርጎ “እኔ እንደሆነ ፣ ለ ሱዚ ባይሆን ኖሮ ፣ እዛ ቤት እንዲች ብዬ አልደርስም ነበር” ከነጩዋ አሜሪካዊት አሳላፊ ከ ወ/ት ሱዛን ጋር ባለፈው ሳምንት የተቀላለዱትን እያስታወሰ ፈገግ አለ።
የዱከምን እንጀራ እርም ብሎ የወ/ሮ አቻሜ ደንበኛ ሆነ ። የሳቸው እንጀራ ወፍራም ሳይሆን ስስ ፣ ደባደቦ የሌለው አይናማ ነው ። አይጠገብም ፤ በሳይንስ ተመርምሮ የተጠና ይመስል ፣ ለሆድ አይከብድም ፣ አያስጨንቅም ፤ ደግሞ ውበቱ ሲማርክ ፣ ወዙ ሲያምር ፤ አለሳለሱስ ደስ ሲል። “ጎመን በጤና ” እንደሚባለው ከዱከም ትኩስ ፣ የሳቸውን የዋለ ፣ ያደረ ፣ የሻገተ ይሻለኛል” አለ። በእንጀራቸው ፍቅር አበደ ። ወ/ሮ አቻሜም እንኳን ፍቅረኛ ፣ ደንበኛ ማስደሰት ያውቁበታል።
ለፍርፍር እየተክነፈነፈ ሲመጣ ፣ ቃተኛ ይመግቡታል ፤ ፤ ስለ ድርቆሻቸው እያለመ ፣ መች በነጋልኝ ሲል ፣ እንደ ህጻን ልጅ በእንጎቻ ይደልሉታል። ለአነባበሮ ምራቁ ጠብ ሲል “እንኳን ጉርሻ ጥፊም ይደገማል እያሉ” ፍትፍት ያበሉታል። እሱም ከፍትፍታቸው ይልቅ ፊታቸውን ይናፍቃል ።

[center]***************************[/center]

ክረምት በመሆኑ ቀኑ ቶሎ ይመሻል። ስስ-በረዶ የተቀላቀለበት ዝናብ ያካፋል። ቸኮል አዲስ መጤውን ኪነን አገር ሲያሳየው ቆይቶ ፣ እግረ-መንገዱን ዩኒቨርስቲ ኦፍ ዋሽንግተን ፊት ለፊት ወደሚገኘው ዱከም-አዳራሽ ምግብ ቤት ቅር እያለው ፣ እየቀፈፈው ይዞት ሄደ።
“ምናለ ወ/ሮ አቻሜ እዚህ አካባቢ ምግብ ቤት ቢከፍቱ? ፣ ይሄንን ሁሉ ሙያ ይዘው ? ፣ ሀብታም ይሆኑ ነበር”
“ግን ፣ የዝችን ሴትዮ እንጀራ መብላት ቀርቶ ፣ እጄን አልጠረግበትም ፤ ባይሆን ፉል በዳቦ አዛለሁ” አለው ኪነን የዱከም-አዳራሽን በር እየከፈተ።
“ምነው? ጋስተራይተስ ይዞሃል እንዴ?”
“የምን ጋስተራይተስ ? ፕሬግናንተስ ነው እንጂ ያስያዘችኝ! እንደ እርጉዝ ያበጠ ሆዱን በሁለት እጁ እየዳሰሰ ። “አሜሪካን አገር አለልኝ ትበል ! አገሬ ብሆን ኖሮ ፣ እኔ ነበርኩ የማስረግዛት!” በ ወ/ሮ ልሳነ-ማርያም ላይ እንደሚዝት ገብቶታል ፤ ከባድ ቂም እንደያዘባት ግን አልጠረጠረም።
“ይልቅ አንዲት ጉደኛ አስተናጋጅ አሳይሀለሁ፣ ልክ እንደ እህቴ ነው የምወዳት ፤ ሱዚ ትባላለች” ኮቱን አውልቆ እየተቀመጠ
“ይሄኔ ስሟ በሰ ፣ ያባቷ ስም በዘ ፣ የሚጀምር ነው ፣ አይደል?” አለ ኪነ
በምን አወክ? አለው በመገረም “ መቼ ነው ሱዛን ዞርን ብዬ የነገርኩት?” ብሎ እያሰበ
“ሰናይት-ዘርፉ ፣ ሶስና-ዘለቀ ፣ ሰላማዊት-ዘገየ ፣ ስንታየሁ-ዘሪሁን ፣ ስህን-ዘነበ ሰብለ-ዘወንጌል” ብሎ ሳይጨርስ
“እረ እቺ የውነቷ ሱዚ ነች ! ኢትዮጵያ ውስጥ ተወልዳ ያደገች ነጭ ናት ፤ ክልስ እንዳትመስልህ ! አባቷም እናቷም እንደዚህ የነጡ ናቸው” የዱከም-አዳራሽ መጠጥ ዝርዝር የተፃፈበትን ነጭ ወረቀት በሌባ ጣቱ እየጠቆመ
“አማርኛ ትሰማለቻ?”
“መስማት ብቻ? ቅኔውን ታስተምርሀለች ! ወላጆችዋ ሰባተኛውን ቀን የሚያከብሩ የአድቬንቲስት ህክምና ሞያተኞች ናቸው ፣ አሁንም አዲስ-አበባ ነው የሚኖሩት ፤ ጥቁር-አንበሳ ይሰራሉ”
“በጣም አሪፍ ነች! ናዝሬት-ስኩል ተምራ ፣ ከፒያሳ ወመኔዎች ጋር ተራግጣ ያደገች ናት” ሲል ወ/ሮ ልሳነ ማርያም ወንበር ሳብ አድርጋ አጠገባቸው ተቀመጠች።
“አቤት መቼም ፣ ጭፈራ አመለጠህ! ፣ ኦባማ የተመረጠ ምሽት፣ የት ነበርክ” አለች
“አንቺ ደልቶሻል ። ሀዘን ላይ ነበርኩ ፣ ለቅሶ ሄጄ ነበር ፣ ቤልቪው” አላት ሲያትልን በምስራቅ የሚያዋስነውን ትንሸ የሀብታም ነዋሪዋች ከተማ እየጠራ
“ውይ! ማ ሞተ” አለች በድንጋጤ
“እንዴ? የመኬይን ዘመዶች እኮ እዛ ናቸው”
“ሂዲ! እግዜር ያስደንግጥህ !”
“ይልቅስ እንደ ጠፋኸው አምሮብሀል፣ ምነው ? ፣ምን ተገኘ?” አለችው በአሽሙር ። በየቀኑ ለምሳ የማይቀረው ዋና ደንበኛዋ ፣ ለ 6 ወር ያህል እንዳልመጣና ምን ያህል ገንዝብ እንዳጣች በአእምሮዋ እያሰላች ፣ በአይኗ አንዴ አይኑን አንዴ ቦርጩን እያፈራረቀች ትቃኛለች።
የኪነን መኖር ችላ ብላዋለች
“እውቀት ተገኘ”
“ኡኡቴ! ለኛም እውቀቱን አካፍለና ታድያ” ፤ አጫጭር ጣቶችዋን ዘርግታ እያስተዋለች። ከተሸረፈው የፊት ጥርሷ ጋር ለመወዳደር ይመስል ፣ ከቀኝ መሀል ጣትዋ ላይ የተለጠፈው ሰው ሰራሽ ጥፍር ተላቆ ጠፍቷል። ከባለቤትዋ ጋር መለያየቷን ለማብሰር ይመስል ፣ የወርቅ ጋብቻ ቀለበቷን ወደ መሃል ጣቷ አዙራዋለች
“እንቆቅልሽ?” አላት
“ምን አውቅልህ?”
“ሲበሉት ሆድ ይጠርዝ ፣ ሲያበዙት ያስረግዝ”
“አ…………አይ የብልግና ነገር እንዳይሆን ብቻ! ፤ በቃ ወንዶች ስትባሉ 24 ሰአት ስለ ግብረ-ስጋ ነው የምታስቡት?” ዝም ብሎ የሚያዳምጠውን ኪነን ለመስደብ ይመስል ፣ አይን አይኑን እያየች።
ትንሽ አሰበችና “ምንድን ነው? አላወኩትም ፤ አንተው ፍታልኝ ። ብቻ ዘርፉ ይሙት ፣ ትባልግና በጥፊ ነው የማጮልህ” አለች ፤ የዛሬ አስር አመት በሞቱት አባቷ ስም እየማለች
“አገር ስጭኝ”
“አቤት-አቤት! ወጉን ሁሉ ታውቅበታለህ ፤ አያቶችህ ናቸው? ወይስ ቅድመ -አያቶችህ ያሳደጉህ?”
መጀመርያ “ሲያትልን ሰጥቼሀለሁ” አለችና ኖ ኖ ኖ ኖ አለች “ሬንተንን ውሰድ ፣ ሲያትል ይበዛብሀል” በደቡብ በኩል ሲያትልን የምታዋስነውን ትንሽ ከተማ በጨዋታ እየሸለመችው
ሬንተንን አግንቼ ፣ ጤፍ አምርቼ ፣ ሙክት አድልቼ ! ሁሉ በጄ ሁሉ በደጄ ! ብሎ ፎከረባት
“ጉረኛ! ከመቼ ጀምሮ ነው ደግሞ ገበሬ የሆንከው? ይልቅ እንቆቅልሹን ፍታልኝ”
“ እንግዲያው እኔ እንደ አንዳንድ ሰዎች ፣ ሰው ማማት አልወድም ፤ ፊት ለፊቱን ልንገርሽ፣ የራስሽን ጉድ !፣ የዱከም እንጀራ ነው እንደዚህ የሚያወፍረኝ” ወደ ተዘረጠጠው ሆዱ እያመለከተና በራሱ ቀልድ ራሱ እየሳቀ
ከመቀመጫዋ በንዴት ብድግ ብላ “አ……….አይ ! እንከባበር !” በእንጀራዋ ስለመጣባት በጣም ተናዳለች
“ሆድህ እስኪቀፈደድ ፣ እስኪቆዘር ድረስ ብላ ብሎ ያስገደደህ እኮ የለም ! ” ብላ ወደ ወጥ-ቤት በቁጣ ተመለሰች።
በዚህ ቀልድ በጣም መናደድዋ ፣ በጥፋትዋ ህሊናዋ እየቆረቆራት መሆን አለበት ፣ ብሎ አመነ።
Image
[center]**********************************[/center]

ሱዚ እንጣጥ እንጣጥ አያለች ፣ በባዶ የመጠጥ ማቅረቢያ ትሪ መቀመጫዋን መታ መታ እያረገች ቀርባ
“ታድያስ ምን ልታዘዝ?” አለች ከሽርጧ ውስጥ ወረቀትና እርሳስ እያወጣች
ነጩ ጸጉሯ እንደ ጥፍሯ ምድምድ ብሎ ተቆርጧል። ቆዳዋም ፈካ ያለ ነጭ ነው። ቆንጅዬ ልጅ ናት፤ ሆኖም እግዜር ጡት ሲያድል ፣ በአካባቢው እንዳልነበረች ያስታውቃል
“እንዴ ! ዛሬ የእግዜር ሰላምታም የለ ?”
“ጤና ይስጥልኝ ቸኮልዬ ፣ የኔ ጌታ እንደምን ሰነበትክልኝ?” ፈገግ ብላ እየተቅለሰለሰች ። ማሾፍዋ እንደሆነ ከሁኔታዋ ያሰታውቃል።
“ሲያሰኝሽ ቸኮልዬ ብለሽ ማቆላመጥ ፣ ሲከፋሽ ችኮ ብሎ መሳደብ ታውቂበታለሽ ፤ ደንበኛ ፎጋሪ ነሽ”
በእድሜ ከሷ እንደሚያንስ ቢገባትም ፣ ወደ ኪነ ዞር ብላ “እሳቸውን አይቼአቸው አላውቅም” አለች
አንደበቷ ፣ ርቅቅ ያለ ፊቷ ፣ ፈገግታዋ ፣ መቅለስለስዋ ሰመመን ያስይዛል። ኪነ በሁለመናዋ ተማርኮ ፣ በአማርኛ ችሎታዋ ተደንቆ ፣ መብረቅ እንደመታው ሰው ፈዞ ፣ አፉን ከፍቶ ቀረ።
“ተዋወቁ ፤ ከባልንጀራዬ ጋር ፣ ኪነ ይባላል፤ ሁለት ወሩ ነው ከመጣ ። ደሞ አንቱ የሚባል አይደለም፤ ከመቼ ወዲህ ነው ደግሞ አንቺ ስነ-ስርአት የተማርሽው?፤ ይልቅስ እንካ ስላንትያ አጫውችኝ።
ቶሎ ብላ “በወላጅ አለ?” አለች የጨዋታውን ህግና ስምምነት ለመረዳት
“ሂጂ ! ባለጌ! በናትና ባባት የለም”
ትንሽ አሰበችና “እንካ ስላንትያ” አለች
“በምንትያ”
“በእንጦጦ”
“እንጦጦማ ያደኩበት ሰፈር አይደል? ፤ ምን አለ በንጦጦ?”
ሌላ ግዜ ቢሆን በብልግና ስድብ ሙልጭ አድርጋ ታስታጥቀው ነበር፣ ዛሬ ግን እንግዳው ኪነ እንዳይታዘባት አንደበቷን ትንሽ በመግታት
“እኔስ አሳሰበኝ ቦርጭህ ተንዘርጥጦ ፤ እንዳይፈነዳልህ እንደፊኛ አብጦ” ጨርሳለች ብሎ በሳቅና በጭብጨባ ሲያደንቃት “ይቅርብህ መብላቱ መሶቡን አሟጦ” በማለት መረቀችለት
ሳቁን ሲጨርስ “አሁን የኔ ተራ ነው” አላት። ገና “እንቺ ስላንትያ” ሳይላት
ደረትዋን በያዘቸው ትሪ ሽፍን አድርጋ “ግን በጡት የለም” አለች ፤ ዘወትር በጡቶችዋ ማነስ የሚያሾፍባት ትዝ ብሏት።

[center]ይቀጥላል....[/center]


3ተኛውን ክፍል ለማንበብ ወደ ገጽ 2 ይሂዱ

Post Reply

Return to “Ethio Art and Culture..ኢትዮ ጥበብ ፤ስነ ጽሁፍ ፤”